ZYMK – ò co tuwò jidze?
ZYMK je niefòrmalną stowôrą zrzeszającą młodëch (dëchã nié całã) lëdzy, chtërny zajimają sã pisaniém dokôzów pò kaszëbskù.
ZYMK nie je zapisóny w niżódnym sądze. ZYMK nikòmù nie słëchô. ZYMKÒWCË nie płacą niżódnëch skłôdków.
Naszą niefòrmalną sedzbą je MÙZÉÙM PISMIENIZNË Ë MÙZYCZI KASZËBSKÒ-PÒMÒRSCZI W WEJROWIE.
Do ZYMKÙ mògą nôleżec wszëtcë ti, co chcą rozwijac swòjé artisticzné taleńta.
ZYMKÒWCË chcą promòwac nowé dokôzë w kaszëbsczi pismieniznie np. wszelczé fòrmë pòezëji (hajkù, erotika ëtd.), prozë (kriminał, nôùkòwô fantazëjô ëtd.). ZYMKÒWCË chcą téż dzejac w nowòmódny mùzyce RAP, hip-hòp, rock ëtd.
Czile razy w rokù ZYMKÒWCË spòtikają sã, bë przëczëtac swòjé nowé dokôzë a téż pògôdac ò dzysdniowi kaszëbsczi pismieniznie.
Rôz w rokù ZYMKÒWCË wëdôwają (jak mają dëtczi – a z tim różno biwało) zsziwk ZYMK. Donëchczôs wëszłë trzë ZYMCZI, w chtërnëch nalazłë sã różné ùtwòrë – pòézëjô, pòwiôstczi, òpòwiôdaniô, skecze, satira ëtd.
Chto chce bëc na zéńdzeniach – nen je, ë kòżdi je mile widzóny. Chto chce dac tekstë do drëkù w ZYMKÙ – nen mòże je dac, nawetka jeżlë nie béł na niżódnym zéńdzenim.
Gazétowim patrónã ZYMKÙ je pismiono ÒDRODA.
ZYMK wëmëszlëlë Michôł Piéper ë Róman Drzéżdżón, pùzni doszlë Pioter Cëskòwsczi, Grégòr J. Schramke, Paùel Szczëpta, Słôwk Fòrmella, Tómk Fópka. Z czasã dołączëlë jini, ë to corôz młodszi.
Je ju widzec malińczi brzôd najégò dzejaniô. Niechtërné tekstë np. Słôwka Fòrmelli, Rómana Drzéżdżóna, Tómka Fópka są wëkòrzistiwóné w kònkùrsach dlô dzecy Rodnô Mòwa ë Bë nie zabëc mòwë starków. Òd przëtrôfkù do przëtrôfkù ZYMKÒWCÓW mòże ùczëc w redio abò òbezdrzec w telewizjë.
Rôczimë do pisaniô ë czëtaniô kaszëbsczich dokôzów!
