Në jo! Zymkòwcë zôs sã pòtkalë, a stało sã to 4 séwnika 2004 r. w gòscynnëch zalach wejrowsczégò mùzéùm. Tim razã na Zéńdzeniu Młodëch Ùtwórców Kaszëbsczëch bëlë: Ala Skiba, Asza Gackòwskô, Karol Rhode, Słôwk Fòrmella, Macéj Dorau, Pauel Szczëpta, Grégòr Jarosz Schramke, Słôwk Krause, gòspòdôrz pałacu Bògùsłôw Breza ë piszący ne słowa Róman Drzéżdżón.
Na nym pòtkaniu wicy bëło czëtaniô nowëch dokôzów, a mni sztridczi o dzysdniową pismieniznã. Swòjé tekstë zaprezentowalë: Ala Skiba, Asza Gackòwskô ë Macéj Dorau - pòezjô, Słôwk Krause – legeńda ë pòezjô, Słôwk Fòrmella – pòwiôstka, Róman Drzéżdżón – satira. Òkróm tegò gôdóné bëło ò wëdaniém czwiôrtégò zsziwkù Zymkù, chtërny mô ùkôzac sã w gòdnikù latoségò rokù. Pòmóc mają w tim Wëdôwizna Region ë Mùzéùm Pismieniznë ë Mùzyczi Kaszëbskò-Pòmorsczi w Wejrowie në ë spònsorzë!
Nôstãpné pòtkanié bdze w gòdnikù abò stëcznikù. Ju terô pòétów, prozajików, spiéwôków ë wszëtczich tëch chtërny czëją kaszëbsczégò dëcha baro serdeczno rôczimë.
Mòżna jesz sélac dokôzë do Zymkù 4. Tak wiãc do robòtë! Na tekstë żdajã do kùńca séwnika, a sélac je nôleżi na kòmpùtrową adresã: belok@NO_SPAM_op.pl.