ZYMK

Pôrã tidzeniów temù, a bëło to 24. strëmiannika 2001 r., we Wejrowie w Mùzeùm Mùzyczi ë Kaszëbskò-Pòmòrsczi Pismieniznë  zeszło sã pôrã òsób. Bëlë to: Bògùsłôw Breza – direchtór Mùzeùm, Michôł Piéper – pòéta ë spiéwôk kapelë Chëcz, Róman Drzéżdżón ë Grégòr J. Schramke – pòécë, Pioter Cëskòwsczi ë Sławòmir Fòrmella – prozajicë. Do tegò przëtomni bëlë: Dariusz Król – òd dôwna znóni dzejôrz, Jiwòna Joc – gazétniczka z pismiona Pomerania, Agnes Bradtke ë jô – reprezentujący pismiono Òdroda.
Ùdba taczégò zéńdzeniégò narodzëła sã pôrã miesąców przódë. Michôł Piéper z Rómanã Drzéżdżónã chcelë zrobic pòétëcczé karno ë do spółdzejaniô zarôczelë Grégòra Schramkã. Na zaczątkù nie bëło wiedzec chto bãdze w nym karnie, dze sã bãdą òdbiwałë zéńdzenia… W strëmiannikù direchtór Mùzeùm dôł swòjã zgòdã na zrobienié taczégò zéńdzeniô w Czëtelni Mùzeùm. Tej w sobòtã, 24. strëmiannika, më sã zeszlë.
Na zaczątkù pòjawił sã jiwer sparłãczóny z mionã karna ë zéńdzeniô. Chòdzëło ò to, że jakbë nazwac sã „Zéńdzenié Młodëch Pòétów” to nie bëłobë to adekwatné do tegò co tam bëło robioné. Doch òkróm wiérztów, bëłë czëtóné prozajicczé dokazë, a téż Michôł zaspiéwôł swòje nowé piesnie. W kùńcu zeszłi rozsądzëlë, że zéńdzenié bądze sã nazëwac: „Zéńdzenié Młodëch Utwórców Kaszëbsczich”.
Prócz tegò decyzëją wszëtczëch nôleżników pismiono Òdroda òstało jich patronã prasowim. Ë temù w kòżdim zymkòwim numrze Òdrodë jedna starna je namieniónô na zaprezentowanié jednégò z pòétów z tegò karna.
To jesz nie wszëtkò. Òstało rozsądzóné, że brzôd tegò zéńdzeniégò òstónie wëdrëkòwóny. Òddôwómë tedë do waji rãk – Czëtińcë – nen zbierk wiérztów, prozë, kąsk muzyczi téż sã najdze. Miéjce téż swiądã, że dzeje sã to dzãka pòmòcë Wejrowsczégò Mùzeùm, bez chterny më bë nie dalë radë ti ksążecczi wëdac.

Miłi lekturë!

Wëdóné bez Mùzeùm Pismieniznë ë Kaszëbskò-Pòmòrsczi Mùzyczi w Wejrowie ë Òdrodã.

Dotowóné bez Pòwiatowé Starostwò w Wejrowie.

Dzél z nëch ksążeczków béł rozdóny òb czas 5. zéńdzeniô Ùtwórców Kaszëbsczi Pismieniznë 28. łżëkwiôta 2001 r. w Wejrowie.

Tekstë zamieszczëlë:

• Paùel Szczëpta – wstãp, pisënk ë skłôd
• Pioter Cëskòwsczi – gôdczi
• Słôwk Formella – gôdczi
• Michôł Piéper – wiérztë
• Grégòr Jarosz Schramke – wiérztë
• Róman Drzéżdżón – wiérztë
• Òkróm tegò do tekstów M. Piépra nótë przëszëkòwa Agnes Bradtke.

Witôjtaż drëszë kòchani!

Wa pewno wszetce wiéta, że kòle Stôri Kiszëwë przebiégô greńca Kaszëb i Kòcewia. Òsoblëwië przekònôł sã ò tim jeden gbùr spòd Kòscérznë, chteren pewnégò jesennégò dnia, cziej ptôchë ju ucékałë na półnié, szedł szasym z Kòscérznë do Zblewa. Jak dochodzôł ju do Stôri Kiszëwë, dozdrzôł jak ptôchë, chterné do ti pòrë lecałë na półnié, w stronã Kòcewia i Bòrów Tucholsczich, zaczãłë zawrôcac na nordã, nazôd na Kaszëbë. Zacekawióny chłop przeszedł przez wies Stôrą Kiszëwã i sztëczk drodżi za nią dozdrzôł prze szasëji tôflã, na chterni bëło napisôné: “Tuwò je Kaszëb kùńc. Ptôchë zawrôcac!”
(wicy…)

***

Jô sedzã w mòjim ògrodze
Miãdzë bómama
Ë żdajã jaż jaczis sen sã zjawi
W mòji głowie
Ë te jô bdã wiedzôł
Cëż Cë rzec móm
Żebë nalezc sã w Twòjim Swiece

***

(wicy…)

Beniël nie przëniese

Czéj czlowiek je mlodi, tej różné glëpòtë sã gò trzimają. Ni mòże ùsëdzëc doma. Dërch bë chòdzyl, a chòdzyl. A jak to gôdô mòja nënka – a jinszé pewno téż – òd tegò chòdzeńiô nick dobrégò nie windze.
Në wejle, nie windze, bò cëż mlodi beniël móglbë przëniesc dodóm. Z dzéwczãtama to je jinszô rzecz, òne mògą przëniesc dodóm baro wiele. Mùszą òpasowac żebë nie bëlo jesz jednégò pësôka do żëwieniô.
(wicy…)