ZYMK » Zbigórz Joskòwsczi

Promòcjô ksążczi

Rómk — Thu, 26 Jun 2008 08:07:28 +0000

Mùzeùm Kaszëbskò-Pòmòrsczi Pismieniznë i Mùzyczi w Wejrowie
rôczi na promòcjã ksążczi
br. Zbigórza Joskòwsczégò
pt.:
BISKUPI Z ZIEMI KASZUBSKIEJ
Słownik biograficzny
chtërnô mdze 5 lëpińca 2008 rokù, ò gòdz. 6 pp
w Mùzeùm kòl szasé Zómkòwi 2a w Wejrowie
Laùdacjã wëgłoszi ks. Leszk Jażdżewsczi

Szkòda czasu na bezdzejnotã, Kòntemplacjô górë

Mark — Sun, 08 Jul 2007 13:53:57 +0000

Szkòda czasu na bezdzejnotã

Dzysô wiele lëdzóm sã zdôwô,
że mają żëcé w swòjich rãkach,
a przëklënają wszëtkò w swiece,
czej dotknie jich swą rãką mãka.

Kò nick za czarzącym czidniãcym
nie stónie sã, ani nie zdżinie,
bò brzôd wërôstô z cãżczi prôcë.
Żëcé nie je graniém na binie!

Ale ni mòżna stojec z bòkù
i zdrzec na jinëch i jadłobic,
le trzeba pòdniesc głowã w górã
i zacząc samémù cos robic.

Żëcé człowieka nie je próbą
przed prôwdzëwim żëcém, kòchaniém,
temù kòżdi sztót mùszi bëlno
wëzwëskac do dobra dzejaniô.

Kòntemplacjô górë

Z wiôldżim dzëwã zdrzã na najé pòlsczé górë,
co swòjima szpëcama blónów tikają;
Królëją, chòc nie są òblôkłé w pùrpùrë,
le na zëmã sã w płôszcz sniégù òblôkają.

Òne bicé wiatru pòkòrno znôszają,
chtëren cwiardo lipstrëjë jich kamné chrzeptë.
A sygając niebios stwórcã ùprôszają
i szpëce, jak rãce, skłôdają do mòdlëtwë.

Jich cwiardëch pòstacjów nick ni mòże rëszëc,
leno mòcnô rãka Bòsczégò Artistë.
A górsczi cëszë niech nicht nie chce zagłëszëc,
bò słëchają szemarzeniô stróżczi rwisti.

Brat Zbigórz Joskòwsczi

Mark — Sun, 08 Jul 2007 13:53:11 +0000

Brat Zbigórz Joskòwsczi OFM Conv. ps. Bazyli Tabacznik, rodã z Serakòjc – kartësczi pòwiôt. Tam-sam dobiwôł nôdgrodë w lëteracczich kònkùrsach m.jin. prozatorsczim m. J. Drzéżdżóna w Wejrowie. Wëdôł ksążczi: Bł. Jan XXIII (PL 2001), Przez Krziż do Bòga (CSB 2004), Gród Gowida. Historia wsi i parafii Gowidlino (PL 2006), zbiérczi wiérztów: Na morzu życia (PL 2006), Tryptyk franciszkański (PL2007), W remionach Piãknoscë (CSB 2007). Òd 1 zélnika 2005 r. je òrganistą ë zakristianã w Òstródze.

Zymkòwcë dobiwają nôdgrodë w kònkùrse miona Jana Drzéżdżóna

Mark — Mon, 15 May 2006 18:25:13 +0000

W Mùzeùm Pismieniznë ë Mùzyczi Kaszëbskò-Pòmòrsczi w Wejrowie, 13 maja 2006 r., rozdówné òstałë nôdgrodë w XI kònkùrsu prozatorsczim miona Jana Drzéżdżóna.
Kòmisjô sãdzowskô w skłôdze: dr Zbigniew Żakiewicz, Barbara Pisarek, prof. Tadeusz Linkner, red. Stanisłôw Janke, w kategòrie jãzëka kaszëbsczégò przëznała nôdgrodë:

I môl – Jarosłôw Kroplewsczi za òpòwiôdanié “Jak Walerémù sã ùdało nikògò”
II môl – Róman Drzéżdżón za òpòwiôdanié “Weszczigóra”
III môl – br. Zbigórz Joskòwsczi za òpòwiôdanié “Na cëzy krziwdze nicht sa nie wzbògacy”
wëróżnienié – Alicja Szczëpta za òpòwiôdanié “Dwùch taczich, co chcało na sztrąd”

Na kònkùrs wpłinãło 14 prôc pò kaszëbskù, je to kąsk mni jak łoni.
Miło je, że dobëło jaż dwùch Zymkòwców br. Zbigórz Joskòwsczi ë Róman Drzéżdżón. Łoni bëło jich téż dwùch: Grégòr Schramke (I môl) ë Róman Drzéżdżón (II môl).
belok