ZYMK » Tómk Fópka

Szlachã Tómka Fópczi

Rómk — Tue, 22 Jan 2008 16:10:34 +0000

Tómk Fópka ë Wëdôwizna Region z Gdinie
baro serdeczno rôczą na promòcje zbiérków:

SMSë do Pana Bòga

Kaszëbsczi Diptik
(w jaczim nalézesz eroticzi: „Szlachama kùsków” ë „Szlachama wzdichnieniów”)

Szpòrtë swójsczé ë kùpczé òd Tómka Fópczi

Promòcëjné zéńdzeniô mdą:
1.2.2008 r. (piątk) gòdz. 18.00 – wieskô zala w Garczu
5.2.2008 r. (wtórk) gòdz. 17.00 – Gòspòda „Jaś Kowalski” w Bëtowie
13.2.2008 r. (strzoda) gòdz. 17.30 – Mieskô Biblioteka w Kòscérznie
14.2.2008 r. (czwiôrtk) gòdz. 18.00 – Gminnô Biblioteka w Lëzënie
15.2.2008 r. (piątk) gòdz. 18.00 w Lãbòrgù
24.2.2008 r. (niedzela) – zala Òstrzódka Kùlturë w Kònarzënach
27.2.2008 r. (strzoda) – kawnica “Bursztynia” w Pùckù
5.3.2008 r. (strzoda) gòdz. 17.00 – Pòwiatowô Biblioteka w Kartuzach
6.3.2008 r. (czwiôrtk) gòdz. 17.00 – Biblioteka w Przedkòwie
11.3.2008 r. (wtórk) gòdz. 18.00 – Miesczi Dodom Kùlturë w Rëmi
12.3.2008 r. (strzoda) gòdz. 17.00 – Biblioteka w Stajszewie (Gimnazjum)
25.3.2008 r. (wtórk) gòdz. 18.00 – remiza w Chwaszczënie
26.3.2008 r. (strzoda) gòdz. 18.00 – Pòwiatowô Biblioteka w Wejrowie
31.3.2008 r. (pòniedzôłk) – Brusë
2.4.2008 r. (strzoda) gòdz. 18.00 – Òstrzódk Kaszëbskò-Pòmòrsczi Kùlturë w Gdinie
3.4.2008 r. (czwiôrtk) gòdz. 17.00 – Gminny Òstrzódk Kùlturë w Serakòjcach

Kòmplet ksążków kòsztô leno 20 zł!!!
Wicy na stronie: www.fopke.pl

Brifka miłotë, ….

Mark — Sun, 08 Jul 2007 13:49:28 +0000

Brifka miłotë

Dze zaòstôl jem
Dze zgùbil jem Cebie, mie
Dôką przëkrëł wszëtkò jem
Zabëł jem

Dze zaòstôl jem
Zabëti jak łońsczi szpôs
Blós le pòmión w czôrnô noc
Ùczëjesz, czej ùwôżnô słëchac mdzesz

Wiéta czemù dzys serce mie dërzi
Colemało sã z piersë wërwie
W kystce nalôzł jem znôu
òd Cë lëst z czerwònym sercã w nim
jakùż pëszno mie, jak mie letkò je
wiém, że Të jesz nie zabëła mie

Kòżdô z Tobą noc
Pòdskôcô, daje mòc
Rzeszi naje swiatë dwa
i w jeden dzél parłãczi nas

2 gromnicznika 2002 rokù, godz. 22.31, Gdiniô- Chiloniô

Z repertuaru karna rockòwégò Chëcz

Blós le Të

Pòj sa ë mùlkã swòjã òbjimnij
rzecz mie, że ni môsz jiny dzes
Pòj sa – tą razą przëzdrzë sã na mie
słëchôj terô, co jô zaspiéwac chcã:
Na wiedno twòja mdã, na wiedno ju
miłotë mòji skra zapôlôł Bóg
Pòj sa ë mòcno calô òbjimnij mie – blós le mie
doch wiész jak jô ledóm ce.
Nié! Nié! Jô kòchóm ce!

Nigdë dosc…

Dzysô piãkno spiéwie ptôszk
Nigdë dosc…
Spiéwô jaż odchòdô złosc
Nigdë dosc…

Słuńca parmin zazdrzôł tej
Nigdë dosc…
Czedë zazdrzec – wiedno wié
Nigdë dosc…

Robôk z dzurë wëtknął łepk
Nigdë dosc…
Chùtkò w górã, wësok- het!
Nigdë dosc…

Bùk je cwiardi jaż po drżéń
Nigdë dosc…
Jak jô lëdóm taczi dzéń!!!
Nigdë dosc…

10 strëmiannika 2000 rokù

SKM-kòwé rozmiszlania

Do sódmi òsta dzesãc minut
SKM pôrëje òd môla w môl
czëjã dwùch bëńlów w głosny rozmòwie
ë je mie jich żôl…

Chãtno bëm jima słowa òdstąpił
chtërné spité bùce majã zabëté
bëlebë głosno, szpetno -
rëczą jak knadżi zegzëté

Sygło, że jeden wësôdł z banë
drëdżémù mùniã sã zwisa
dze terô gôdka, tak pësznô przed sztócëkã?
Kùńc! Szkòda pisac!

2.10.2000 rokù, midzë Rëmią a Cisową

Telefón

Alo! Alo!
Tu gôdô Stach
Bùksë dzurawé
W bùksach strach

Alo! Tu jô!
Fôpków Tómk!
Jô móm dwa dëtczi-
Król mô zómk

Alo! Mëma?
Jô, sënkù – jô
Dzwòniã zapitac
Co të bë zjôdł?

Alo? Alo?
Pòchwôlony!
Rzecze mie zarô
Co môsz zgrzészoné!

Alo? Spôlony?
Niech le walą!
Chùtkò wala
W brómkã balą!

Alo! Alo!
Tu gôdô Stach
Bùksë dzurawé
W bùksach strach

10 strëmiannika 2000 rokù

Kabaret, Pórta, Tatowi…, Na pół z rzëcą

Mark — Sun, 08 Jul 2007 13:47:36 +0000

Kabaret

Mùz. T. Fópka
Ref.
Ò tim. co ce bòli, gniece – w kabarece
Co w szeroczim czëc je swiece – w kabarece
Wiców łupa tùwò żdże ce – w kabarece
Czas pòwôdżi maskã zdrzëcëc – w kabarece
Lëdzczé fele, słabé stronë
bądą wnet wënagòloné
Ref.
Pòliticzné wińdą sprawë
Kò ne téż są dosc cekawé
Ref.
Z chłopów białczi, z białków chłopi
Mdą czichrotac, szportë robic
Ref.
Na wëszczérczi pòj z kùlturką
Wlézë bëne smiéchù pórtką
Ref.

Tómk Fópka, Chwaszczëno, 7 gromicznika 2003 rokù, gòdz. 21.04

Pórta

Za cemną, nieòdgadłą pórtą gòrô żëcé…
Czëc je zwón nôpiartégò serca…
A dësza nabiérô lëftu i chùchô…
Òczë stoją na starżi wseczëcowi krejamnotë…
Rãce smùkają jawernotã…
Cos tej sej sã tëmlëje, kùlduksô, szpókùje
I wstec dërchô w bezspikù…
Chto pòdô klucz zadżinionémù w mëslach…?
Chto mieszkô za cãżczima dwiérzama…?
Czë w całoscë…?
Czë…?
Zëmnyma słowama nawetka anioł
Nie mdze w sztãdze òdsztëkac zarostowónégò zómkù
Leno chto dzys dnia pòtkôł anioła…?
Zmerkôł jem blós dzélëk jegò ruchna…
Wicy nie dô sã lëdzczémù robôkowi òbjimnąc rozëmã…

Tómk Fópka, Kalisz, 28.03.2004

Tatowi…

Sprawiedlëwi cãżôr rãczi,
Co jesc dodóm przënôsza, w taszi chléb z tomatą,
Worztë, tutã bómków a czasã téż gazétã…
W chëczi Mëma żdaje, z Nią dzôtków grónkò na to,
Żebë Òjca òbôczëc, razã noc przëwitac…
Sprawiedlëwi cãżôr rãczi,
Chtërna dozéra chòwã, do rézë szëkòwa,
Zemiã tak płëgã smùka, jãdrzny brzôd z ni zbiéra…
Kôzała jã ùwôżac, jak sã òd ni nie dac,
Pòtrafia drogã wskôzac- czej przeszło wëbiérac…
Sprawiedlëwi cãżôr rãczi,
Co ùcza drëdżich achtnąc, kaszëbską stanicã,
I z Bògã krótkò trzëmac i wiedzec, co sã chce…
A zasłużił so rôz chto- tej prosto wënica…
Dzys le sã to pamiãtô: Jak dobrze, czej Tatk je…
Tómk Fópka
Chwaszczëno, 11. łżekwiata 2004

Na pół z rzëcą

Òd zéńdzeniô do zéńdzeniô
Czas nóm lecy chùtkò
Czej òb zëmã mróz sã sklëni…
W noc czerwińca krótką…
Wiedno jedną môsz òdpòwiesc:
Nié! I na tim kùńc je!
Nick, że ùszë móm òdmiarzłé…
Twój na głowie wiónk schnie…
Lubną skarnią sëwé włosë
Tam sam przëkriwają…
A jô przë ce czësto łësy
Zestarzôł sã , żdając…
Że mie w kùńcu “jo” òdrzekniesz
Dëszã cwiardą zmikczisz
Të le swòjim “nié” wcyg przék mie
Kòżdą gôdkã kùńczisz!
Do zgłëpieniô z tim kùńczenim
Gôdczi, z tobą bëcô!
Cos mie bierze wcąg na smienié-
Wiérzta na pół z rzëcą!

Tómk Fópka, Chwaszczëno, 13 lëpińca 2004r., gòdz. 21.21

Tómk Fópka

Mark — Sun, 08 Jul 2007 13:46:35 +0000

Ùrodzył sã 10 lëpińca 1973 r. w Gdinie. Absolwent Mechanicznégò Technikùm w Gdinie. W 1999 r. dostôł titël magistra kùńsztu ò szpecjalnoscë: solowi spiéw w Akademie Mùzyczny we Gduńskù.
Pò sztudiach robił jakno pòdjinspektor w Pòwiatowim Starostwie w Wejrowie, a pòtemù bez dwa lata béł naczelnikã Wëdzélu Kùlturë ë Promòcje Pòwiatë wejrowsczégò starostwa. W latach 2003-06 béł wicebùrmistrzã Gminë Żukòwò.
Wespółdzejô z telewizjowim magazynã „Rodnô Zemia” ë radiowim „Na bôtach i w bòrach”. Òd 2004 r. je przédnikã Radzëznë Kaszëbsczich Chùrów, òd 2008 r. wiceprzédnikã Kaszëbskò-Pòmòrsczégò Zrzeszeniô.
Pòéta, felietónista, kòmpòzytor (òd klasyczi do RAP). Swòje dokazë drëkòwôł m.jin. w Pòmeranii, Kaszëbsczi Òdrodze, Gazéce Nadmòrsczi, Gazéce Kartësczi.
Je dobéwcą lëteracczich nôdgrodów m.jin.: nôdgrodë m. Rómana Wróblewsczégò dlô młodégò kaszëbsczégò pòétë (2001 r.), kònkùrsu na wiérztã ò Matce Bòsczi Swiónowsczi (2002 r.), Òglowòpòlsczégò Lëteracczégò Kònkùrsu m. Mieczësława Strijewsczégò w Lãbòrgù (2002 r.). Méster kaszëbsczégò pisënkù w 2004 r.
Je aùtórã czile ksążków m.jin.: „Szlachama kùsków” (2004 r.) – eroticzi, „Kaszëbsczi diptik: Szlachama kùsków; Szlachama wzdichnieniów” (2007 r.) – eroticzi, „Esemesë do Pana Bòga” (2007 r.) – wiérztë , „Szpòrtë swójsczé a kùpczé òd Tomeka Fópczi” (2008 r.) – szpòrtë.
Je ùsôdzcą „Pierszi Kaszëbsczi Pasji” wëstawiony pò rôz pierszi w 2002 r. (wëdóny w 2003 r.), jinicjatorã pòwstaniô platków m.jin.: „Kaszëbi na Gòdë” (2004 r.), ë wespółaùtórã spiéwnika z platką CD “Piesnie Rodny Zemi” (2004 r.).
Dokazów Tómka szukôj na stronach: www.fopke.pl www.naszkaszuby.pl

Ùroczëstosc wrãczeniô Medalu Stolema Tómkòwi Fópce

Mark — Fri, 11 May 2007 18:43:58 +0000

Wszëtczich Zymkówców serdeczno rôczimë na ùroczëstosc wrãczeniô Medalu Stolema Tómkòwi Fópce.
Ùroczëstosc òdbãdze sã 22 maja (wtórk) w Staromiesczim Rôtëszu w Gduńskù ò 6 gòdzënie wieczór.

Tómk Fópka wëróżniony Medalią Stolema

Mark — Tue, 08 May 2007 18:40:42 +0000

Tómk Fópka, nôlëżnik karna ZYMK, òstôł wëróżniony przez Klub Sztudérów Pomerania, za swòją robòtã na kaszëbsczim gónie, Medalią Stolema.

Gratulëjema najemù drëchòwi ë żëczëmë dôlszi bòkadny robòtë w rozkòscerzaniô kaszëbsczégò dëcha.

Zymkòwcë