egzystencją mòżesz grac jak w òperze

zmieniwają są dwùgôdczi midzë niebã a zemią

mòżesz przelezc z lëtewką pòspiechù

spiéwôk sã pòmilił i zagrôł kòncert skòczka

w môl eùfòrii melanchòlijnym tonã

glorii entuzjôzm òpôdł pò skrzidłach

niezjiscony sztëczk żëcô spôdł jak kam

pòtencjalnégò zabôczeniô czegòs

wëcarti krëjamną gùmką fragment libretta

grają na diôbelsczich skrzipkach diôchłë

wëliczanczi talentów co zwłokama czasu

kładzą sã môłczenim midzë Verdim a Bachã

ze zbiérkù “Testameńtë jimaginacji”

szafa

dwiérze szafë òtemkłë sã

i më weszlë w ji żëwòt drewióny

migdałowò pôchnący bezszelestny

przelot cmë zawierusził sã

na skarpetce zwiastunce cepła

w gestach marinarczi òdpinô sã

gùz zadąsóny na nitce

schòwôł sã stôri kòt

na délu bezpiecznoscë

wbité dwa gòzdze rozpiąté

bùksë do górë nogówkóma

pòd bùkietã bluzków malowóné wiérztë

artistny profil bałaganów

i gałganów niepòkòju

i pôchnie perfùm fantazmatów

arómatów nieprzitómnëch

ze zbiérkù “Testameńtë jimaginacji”

Hana Makùrôt

Hana Makùrôt - je absolwentką pòlsczi filologii i slawisticzi, terôczasno doktorantką Gduńsczégò Ùniwersytetu zajimającą sã problemã pòlskò-kaszëbsczich jãzëkòwëch cësków, òkróm tegò sztudérëje téż filozofiã i psychòlogiã. W 2006 rokù napisała pierszi w Pòlsce magistersczi dokôz w kaszëbsczim jãzëkù. Je aùtorką wicy jak 50 nôùkòwëch pùblikacjów z zasygù kaszëbsczi i słowiańsczi lingwisticzi. W 2010 r. wëdôwizna Region wëdała ji pierszi zbiérk wiérztów zatitlowóny „Chléw”, pòstãpny tomik „Testameńtë jimaginacji” òstôł wëdóny w 2011 r. przez Òficynã Czec. Dolmaczéra lëteraturë ze słowiańsczich jãzëków na kaszëbiznã (z rusczégò, serbsczégò, sloweńsczégò i pòlsczégò jãzëka), dolmaczéra “Ùstawù ò nôrodnëch i etnicznëch miészëznach a ò regionalnym jãzëkù“. W 2009 r. wëszło drëkã ji dolmaczenié „Dramatów” Lecha Bądkòwsczégò.  W 2007 rokù laùreatka Lëteracczégò Kònkùrsu m. Mieczisława Strijewsczégò i laùreatka kònkùrsu na nôlepszégò sztudérã Trójgardu Primus Inter Pares. W 2009 r. dobëła nôdgrodã Sztudérsczégò Nobla. W akademicczim rokù 2005/2006 – przédniczka Karna Sztudérów Pòmòraniô. Nôleżnik Pòlsczi Lingwistny Stowôrë (PTJ) i Stowôrë Dolmaczérów Pòlsczich (STP).

Dokazë Hanë mòże nazlezc téż na ji starnie

http://meta-fizyka.blogspot.com/