ZYMK

Pòétóm natchnieniô niebiańsczégò
Prozajikóm pióra letczégò
Gôdôszóm jãzëka dżãtczégò
Satirikóm smiechù wiôldżégò
Gazétnikóm tématów do òpisaniô
Czëtińcóm wiela dokôzów do czëtaniô!

Z leżnoscë Gòdów a Nowégò Rokù
Bòkadoscë, szczesô ë miłotë
Żëczą ZYMKÒWCË

Redakcjô Tëgòdnika „Kurier Bytowski” ògłôszô kònkùrs na òpòwiôdanié pò kaszëbskù na témã fantasticzną, fantasticzno-nôùkòwą ë pòpùlarno-nôùkòwą.
Niepòdpisóné prôce, òznaczoné céchã, mające co nômni 2 znormalizowóné stronë A4, a nié wicy jak 10 taczich stron, pisóné kòmpùtrową czczonką Times New Roman, rozmiôr 14, nót je wësłac w 3 ekzemplôrzach do 15 stëcznika 2008 r. na adresã òrganizatora.
Dóné ò aùtorze mùszi doparłączëc w zamkłi kòpérce.
Ògłoszenié wëników mdze nie pózni, jak do kùńca gromicznika 2008 r. òb czas zéńdzeniô aùtorów, sãdzów ë òrganizatora kònkùrsu.
Òrganizatór kònkùrsu dôwô so prawò pùblikacjë nôlepszëch tekstów na łamach òbéńdowëch gazétów wëchôdającëch na Kaszëbach.
Przëznóné mdą nôdgrodë:
I môl – 400 zł
II môl – 250 zł
III môl – 150 zł
Adres òrganizatora: “Kurier Bytowski” 77-100 Bytów, ul. Zielona 5.

Dnia 20 czerwińca o godzënie 5 pp w Wejrowie òdbądze sã zéńdzenié Zymkòwców ze słëchińcama kùrsu kaszëbsczégò jãzëka jaczich prowadzy Zymkówc Tómk Fópka.
Na zéńdzenim mómë zaprezentowac swòjé nôlepszé dokôzë a pògadac ò naszi stowôrze.
Ti, jaczi chcą zaprezentowac sã w Wejrowie proszã ò napisanié dó mia na adresa belok1 AT o2 DOT pl

Z zymkòwim pòzdrówkã

Róman Drzéżdżón

Wszëtczich Zymkówców serdeczno rôczimë na ùroczëstosc wrãczeniô Medalu Stolema Tómkòwi Fópce.
Ùroczëstosc òdbãdze sã 22 maja (wtórk) w Staromiesczim Rôtëszu w Gduńskù ò 6 gòdzënie wieczór.

Tómk Fópka, nôlëżnik karna ZYMK, òstôł wëróżniony przez Klub Sztudérów Pomerania, za swòją robòtã na kaszëbsczim gónie, Medalią Stolema.

Gratulëjema najemù drëchòwi ë żëczëmë dôlszi bòkadny robòtë w rozkòscerzaniô kaszëbsczégò dëcha.

Zymkòwcë

Zéńdzenié Zymkòwców w Wejrowie 9 gòdnika 2006 r.

Czej zabrôł jem sã za pisanié négò tekstu wiodro za òknã bëło szaré a kòmùdné i nijak nie zachãcywało, abë wëlezc bùten. Równak wiele bëło òb czas latosy jeseni dniów, czej nôtëra robia nóm rozmajité szpôsë, bò, chòc to jidze kù zëmie, wiodro szlachòwało nié za jesenią a barżi prawie za zymkã. Tej sej czëjã, i na gwës je w tim wiele prôwdë, że taczé wëmiészanié cządów rokù nie je dobré, równak je taczi môl, gdze wiedno, niezanôléżno òd cządu rokù, gòscëc pòwinien zymk. Môlã tim są serca i môdżi młodëch (nié blós całã ale téż dëchã) ùtwórców kaszëbsczich przënôlégającëch do karna Zymkòwców.

(wicy…)

XII Zéńdzenié Młodëch Ùtwórców Kaszëbsczich

Kòmùdnô sobòta, deszcz padô, zëmno. Kùńc łżëkwiôta a zymkù nie je widzec. Zymkù jakno cządë rokù, bò Zymk jakno zéńdzenié młodëch ùtwórców kaszëbsczich pò dłudżi zëmòwi przerwie prawie terô mô sã òdbëc.
Wejrowò, 29 łżëkwiôta, gòdz. 10.00 kaszëbsczi twórcowie zajéżdżają pòd wejrowsczé mùzeùm. Rëchùjemë: je Pioter Cëskòwsczi, Słôwk Krause ë piszący ne słowa Róman Drzéżdżón. Za sztót pòjôwiô sã Tómk Fópka. Ë tuwò zdzëwienié. Tómk je òblekłi w bluzã. Wëzdrzi colemało, jak hiphòpòwiec.
– Dze ancuch? – pitómë.
– Doch czedës mùszã òd tegò służbòwégò òbleczenkù òdpòczic – smieje sã Tómk.
Hùmòrë zarôzka sã pòprôwiają.
(wicy…)

Zéńdzenié Młodëch Ùtwórców Kaszëbsczich ZYMK
Mùzeùm Pismieniznë ë Mùzyczi Kaszëbskò-Pòmòrsczi w Wejrowie
Òglowi Zarząd Kaszëbskò-Pòmòrsczégò Zrzeszeniô
rôczi baro serdeczno
na zéńdzenié

ZYMKÙ

chtërné òdbądze sã 9 gòdnika (sobòta), gòdz. 10.00

w Mùzeùm Pismieniznë ë Mùzyczi Kaszëbskò-Pòmòrsczi w Wejrowie, sztr. Zómkòwô 2a

W programie:

Jak wiedno mdze wiele nônowszi kaszëbsczi pòezje, szpòrtu a prozë.

• specjalny gòsc : Jaromira Labùdda, chtërnô òpòwié ò swòji twórczoscë.
• prezentacjô nônowszëch dokôzów Zymkòwców
• wëbiér dokôzów do zsziwkù Zymk 6
• diskùsjô ò dzysdniowi lëteraturze

Aj, drãgò szło wëdanié 5. zsziwkù Zymk, drãgò. Cãżczi to béł pòród, ale w kùńcu sã ùdôł. Chòc nen numer mógł ju wińdz z drëkarnie w gòdnikù 2005 r., abò w stëcznikù 2006 r., jednakò dopiérzë w czerwińcu 2006 r. dokôzë 14 młodëch kaszëbsczich lëteratów ùzdrzałë wid swiata. Në cëż, lepi pòzdze jak wcale.
Nie bëło bë tegò Zymkù, czejbë nié czile lëdzy. Na pierszim placu nót je pòdzãkòwac Bògùsławòwi Bréze – direchtorowi Mùzeùm Pismieniznë ë Kaszëbskò-Pòmòrsczi Mùzyczi w Wejrowie. To òn pòstôrôł sã ò dotacjã z Ministerstwa Bënowëch Sprôw ë Administracjë, chtërné pòzëskôł Òglowi Zarząd Kaszëbskò-Pòmòrsczégò Zrzeszeniô. Kąsk je to pòkraconé, ale doch żëjemë w kraju zwónym Pòlską… Tu nick ni mòże bëc prosté! Dëtczi na nen zbòżny cél delë téż Jan, Tomôsz ë Adam Drzéżdżónowie ze Starzëna. Wiôldżé dzãka!
(wicy…)

W Mùzeùm Pismieniznë ë Mùzyczi Kaszëbskò-Pòmòrsczi w Wejrowie, 13 maja 2006 r., rozdówné òstałë nôdgrodë w XI kònkùrsu prozatorsczim miona Jana Drzéżdżóna.
Kòmisjô sãdzowskô w skłôdze: dr Zbigniew Żakiewicz, Barbara Pisarek, prof. Tadeusz Linkner, red. Stanisłôw Janke, w kategòrie jãzëka kaszëbsczégò przëznała nôdgrodë:

• I môl – Jarosłôw Kroplewsczi za òpòwiôdanié “Jak Walerémù sã ùdało nikògò”
• II môl – Róman Drzéżdżón za òpòwiôdanié “Weszczigóra”
• III môl – br. Zbigórz Joskòwsczi za òpòwiôdanié “Na cëzy krziwdze nicht sa nie wzbògacy”
• wëróżnienié – Alicja Szczëpta za òpòwiôdanié “Dwùch taczich, co chcało na sztrąd”

Na kònkùrs wpłinãło 14 prôc pò kaszëbskù, je to kąsk mni jak łoni.
Miło je, że dobëło jaż dwùch Zymkòwców br. Zbigórz Joskòwsczi ë Róman Drzéżdżón. Łoni bëło jich téż dwùch: Grégòr Schramke (I môl) ë Róman Drzéżdżón (II môl).
belok