Zôczątk gòdzëna 11.00

Nadszedł ju nen dzél w rokù, czej drzéwiãta tracą swòje lëstë a dzéń robi sã corôz to krótszi. Równak w Mùzeùm Pismieniznë i Kaszëbskò-Pòmòrsczi Mùzyczi w Wejrowie wcyg dérëje zymk. Jak to je mòżlëwé?
Sta sã tak dlôte, że w sobòtã 27 séwnika 2008 rokù ò 12 w pôłnié òdbëło sã prawie w tim placu pòstãpné zéńdzenié nôleżników karna Zymkòwców. Tim razã bëło na nie przëszłé dosc wiele lëdzy. Òkróm donëchczasnégò przédnika, to je Rómana Drzeżdżóna, bëtnikama zetkaniô bëlë: Hana Makùrôt, Alicjô Scziba, Lucyna Sorn, Mateùsz Bùlmann, Słôwk Chòlcha, Tómk Fópka, Słôwk Fòrmella, Adam Hébel, Słôwk Kllas (felało jesz Sławka Krause; razã z nim bëło bë jaż szterzech Sławków), Dark Majkòwsczi i Karól Rhode.
Na zôczątkù zéńdzeniégò Rómk kąsk “òprëczkòwôł” Zymkòwców, żebë czãscy zazérelë na jinternetową starnã ZYMK-ù. Równak przédną témą zetkaniô bëło òbgôdanié planów na nôblëższą przińdnotã, a przede wszëtczim sprawa wëdaniô sódmégò zsziwkù ZYMK-ù. Mô òn wińc w gòdnikù latoségò rokù a promòcjô jegò sparłãczonô mô bëc z òglowim zéńdzenim piszącëch pò kaszëbskù, co wiedno prawie w tim miesącu òdbiwô sã w wejrowsczim mùzeùm. Zsziwk nen liczëc mô 60 starnów.
Kôrbienia ùczãstników zetkaniégò ùrozmajiconé òstałë przez Tómkã Fópkã, chtëren przëczëtôł dokôz ò stojenim w rédze zwóny téż z pòlska “kòlejką” (chòdzy tuwò gwësno ò taką, co stoji w krómie, abò nawetka w “hiperkrómie”). Òkôzało sã tej, że Tómk Fópka i Rómk Drzéżdżón wpedlë na nową ùdbã, zebë razã twòrzëc felietónë. Swòje nowé tekstë zaprezentowa téż Lucyna Sorn.
Co sã tikô kąsk dalszi przińdnotë, to ósmi zsziwk ZYMK-ù ùdbóny mô bëc na taczi ôrt, żebë nalazłë sã tam przede wszëtczim dokôzë na binã. Z tim planowanim je równak taczi tôczel, że tak do kùńca ni mòżemë bëc gwësny, czë Zymkòwcóm przińdze do głowë jaż tëli ùdbów na tegò zortu dokôzë, żebë wëpełnic nima całi zsziwk. Kò doch szósti numer ZYMK-ù miôł bëc stwòrzony z mëslą ò dzecach, a timczasã pózni nie ùdało sã tegò planu zjiscëc.
Òkróm tegò mùsz je nadczidnąc ò jesz jedny baro wôżny sprawie. Sta sã tak, że “wiater òdnowë”, co wcyg sprôwiô, że lëdze dërch zmieniwają swòje stanowiszcza i czerëją sã abò w górã, abò w dół, wieje téż nad ZYMK-ã. Na zéńdzenim ùdbóné òstało, że donëchczasny przédnik najegò karna Rómk Drzéżdżón bãdze nim czerowôł ju leno do kùńca latoségò rokù, to je tak pò prôwdze do wëdaniégò nôblëższégò zsziwkù. Nastãpniczką Rómka bãdze Alicjô Scziba. Widzymë tej, że skùńcził sã czas chłopsczich rządów w ZYMK-ù. Terô ju białczënô rãka nim pòczerëje.

Słôwk Fòrmella

W programie:
Òbgôdanié nônowszich zymkòwëch dokazów
Kôrbiónka ò latosym wëdanim zsziwkù Zymkù
Zaplanowanié robòtë na 2009 r.

Tej, piszący, do robòtë! Na waju dokazë żdajemë do kùńca czerwińca.

Tuwo czile òdjimków aùtorstwa Sławeka Fòrmelle:

TEKSTË PROSZIMË SÉLAC DO KÙŃCA CZERWIŃCA NEGÒ ROKÙ!!!

Mòżeta napisac ò czim le chceta. Dokôzë mògą bëc wiérztowóné abò prozatorsczé. Mògą to bëc dokôzë na binã, eroticzi, òpòwiescë, fantastika, dlô dzecy, młodzëznë, straszich, nôstôrszich, białk czë chłopów – co le wama do głowë przińdze.
Zymk 7 (jak nen czas flot nëkô!) ùkôże sã pòd kùńc negò rokù.
Òkróm negò chcemë wëdawac òsóbné zbiérczi Zymkòwców. Chòc dwa w rokù. Temù proszã sélac swòje ùdbë tzn. ju w całoscë zebróné gwôsné tekstë, jaczé chceta wëdac (jednô ju do redakcëji doszła, zó co dzãkùjã (rd)). Mòże jesz latos niżódnégò nie wëdómë, ale ju na przińdny rok na 99,99% jo.

Róman Drzéżdżón

Z zymkòwim pòzdrówkã

Róman Drzéżdżón

Czej zabrôł jem sã za pisanié négò tekstu wiodro za òknã bëło szaré a kòmùdné i nijak nie zachãcywało, abë wëlezc bùten. Równak wiele bëło òb czas latosy jeseni dniów, czej nôtëra robia nóm rozmajité szpôsë, bò, chòc to jidze kù zëmie, wiodro szlachòwało nié za jesenią a barżi prawie za zymkã. Tej sej czëjã, i na gwës je w tim wiele prôwdë, że taczé wëmiészanié cządów rokù nie je dobré, równak je taczi môl, gdze wiedno, niezanôléżno òd cządu rokù, gòscëc pòwinien zymk. Môlã tim są serca i môdżi młodëch (nié blós całã ale téż dëchã) ùtwórców kaszëbsczich przënôlégającëch do karna Zymkòwców.

Dnia 9 gòdnika 2006 r. zebrelë sã òni pòstãpny (chtëż zrechùje chtërny ju pò prôwdze?) rôz w Mùzeùm Pismieniznë ë Mùzyczi Kaszëbsko-Pòmòrsczi w Wejrowie. Na zéńdzenim nym widzôł jem wiele lëdzy, z jaczima miôł jem ju leżnosc zéńc sã przódë. Bëlë to: Ala Skiba, Pioter Cëskòwsczi, Rómk Drzéżdżón i Słôwk Krause, chtëren przëjachôł z swòją córą Aną. Òkróm tegò béł na nym zéńdzenim Wòjcech Mëszk, chtërnégò znôł jem donëchczôs leno z jegò dokôzów w „Zymkù” i grëpka gòscy, do chtërnëch przënôlégelë: Sylwiô Czaja, Ewelina Kaatz, Mark Mudlaw, młodi, nieznóny nóm z miona dzewùs (kąsk pózni doznôł jem sã, że pisze magistersczi dokôz na témã pòezji młodëch ùtwórców kaszëbsczich) i Emilia Waszkòwskô z Radia Kaszëbë. Na jaczis czas òdwiedzył téż naju gòspòdôrz môla, gdze òdbiwało sã naje zetkanié, czëlë direktor wejrowsczégò mùzeùm wasta Bògùsłôw Breza. Òsoblëwie równak achtna Zymkòwców swòją bëtnoscą bëlnô kaszëbskô pòetka Jaromira Labùdda. Je òna córą jednégò z nôbarżi znónëch ùtwórców kaszëbsczich, czëlë Aleksandra Labùdë znónégò téż jakno Gùczów Mack.

Pierszim dzélã najégò zéńdzeniégò bëło prawie wëstąpienié Jaromirë Labùddë, chtërna rzekła nóm përznã ò swòjim ùtwórstwie i ò kaszëbsczi lëteratùrze lat sétmëdzesątëch 20-tegò stalatégò, czedë to zacza zajimac sã kaszëbizną. Gôda nóm ò swòjëch związkach ze Zrzeszińcama i ò wiôldżim ùwôżanim, jaczé dlô nëch mia. Mówia téż, że baro bë chca wëdac chòc jeden z ùrëchtowónëch przez se ùczbòwników kaszëbsczégò jãzëka, równak dërch mô z tim baro wiôldżi jiwer i to nié z winë pòlsczégò rządu, leno „swòjëch”. Równak jakno ùpiartô Kaszëbka rzekła, że zaweznie sã i tak długò nie wëdô nowégò zsziwkù ze swòjima wiérztama, jaż nie òstónie wëdóny chòc le jeden z ji ùczbòwników. Òkróm tegò przeczëta nóm jeden ze swòjëch pòeticczich dokôzów.

Wastna Labùdda ni mògła równak bëc na całim najim zéńdzenim, bò mùsza jachac na ùczbòwnią i zarô pò tim, jak skùńcza swòje wëstąpienié, mùsza flot rëszëc na banowiszcze, gdze òdwiózł jã Rómk Drzéżdżón. Timczasã reszta Zymkòwców przëstąpia tedë do nastãpnégò dzéla zetkaniégò, czëlë do przedstawieniô przez zebrónëch swòjëch nowëch dokôzów. Jakno pierszi przeczëtôł swój tekst niżi pòdpisóny, czëlë Słôwk Fòrmella. Tekst, jaczi ùrëchtowôł jem na to zéńdzenié, béł nôdłëgszi ze wszëtczich, jaczé jem donëchczôs napisôł. Temù téż Rómk, jesz przed tim, jak òdwiózł wastnã Labùddã na banã, pòwiedzôł, żebë jô zaczął jakno pierszi, bò móm, jak rzekł ze szpôsã w głosu, tekst „na dwie gòdzënë”. Czëtanié jegò na szczescé nie dérowało jaż tak długò i pò szportownym pòczątkù przëszedł czas na kąsk jiny, ju barżi liriczny nastrój, w chtërny wprowôdza Zymkòwców i jich gòscy swòjima wiérztama Alicjô Skiba. Òkróm tegò Rómk Drzéżdżón przeczëtôł jednã swòjã wiérztã, co òsta wëdrëkòwónô w „Stegnie” i pòeticczi dokôz, chtërnégò autorkama są Sylwiô Czaja i Ewelina Kaatz.

W kùńcowim dzélu zéńdzeniégò nasz nieòficjalny przédnik, czëlë Rómk Drzéżdżón rzekł, jak wëzdrzi òglowô sytuacjô „Zymkù”. Gôdôł jaczé mni wicy dokôzë ùdbôł sã dac do nastãpnégò zsziwkù, chtëren mô wińc na zaczątkù przińdnégò rokù. Zachãcywôł téż lëdzy do pisaniô, bò jak wiémë, bëlnégò zachãceniégò nigdë nie je za wiele, pò czim ùczãstnicë zéńdzeniégò zaczãlë sã ju pòmalinkù rozchòdzëc.

A wic do ùzdrzeniô na pòstãpnym zéńdzenim!

Słôwk Fòrmella

Kòmùdnô sobòta, deszcz padô, zëmno. Kùńc łżëkwiôta a zymkù nie je widzec. Zymkù jakno cządë rokù, bò Zymk jakno zéńdzenié młodëch ùtwórców kaszëbsczich pò dłudżi zëmòwi przerwie prawie terô mô sã òdbëc.
Wejrowò, 29 łżëkwiôta, gòdz. 10.00 kaszëbsczi twórcowie zajéżdżają pòd wejrowsczé mùzeùm. Rëchùjemë: je Pioter Cëskòwsczi, Słôwk Krause ë piszący ne słowa Róman Drzéżdżón. Za sztót pòjôwiô sã Tómk Fópka. Ë tuwò zdzëwienié. Tómk je òblekłi w bluzã. Wëzdrzi colemało, jak hiphòpòwiec.
– Dze ancuch? – pitómë.
– Doch czedës mùszã òd tegò służbòwégò òbleczenkù òdpòczic – smieje sã Tómk.
Hùmòrë zarôzka sã pòprôwiają.
Stróż wpùszczô naju do mùzealny czëtelni. Wtim wchôdë Słôwk Fòrmella. Je kąsk zmòkłi bò mùszôł sztëk drodżi z banë do mùzeùm w deszczu jic. Nic to jednakò jemù nie robi, je ùsmióny jak zymkòwé słunôszkò.
Sôdómë do stołë. Wëcygómë z taszów swòjé dokôzë. Zaczinô Tómk, jak wiedno spiéwno. Zaprezentowôł nama czile nowëch piesniów. Pòtémù swòjé nowé wiérztë czëtô Słôwk Krause. Wpôdómë w pòeticzno-refleksyjné klimatë. W taczim samim ôrce są wiérztë Rómana Drzéżdżóna, chtërny znôwù zaczął pisac pòwôżné pòezje. Pòtémù rozwesélają naju dolmaczënczi znónëch pòlsczich piosenków, jaczé zrëchtowôł Pioter Cëskòwsczi. Bdą òne spiéwóné przez Kaszëbsczi Kabaret FiF.
W midzëczasu przëjachała Karolëna Serkòwskô z Kartëz. Tòwarzëszą ji drëszczi Agnesa Dopke ë Justina Serkòwskô. Karolëna pëszno przeczëtała czile swòjëch pòeticznëch dokôzów. Rzekła téż ò tim, że zaczinô pisac prozã. Pierszi ji òpòwiôdanié ùkôzôło sã w strëmiannikòwi Kaszëbsczi Òdrodze. Béł to dokôz dlô dzecy pt. Dwa Michałë.
Jeżlë jidze ò dzecuszka, to doszlë më do ùdbë, że w Zymkù 6, jaczi ùkôże sã pòd kùńc tegò rokù, nalézą sã dokôzë napisóné apartno dlô dzecy.
Ùstalëlë më téż, że nôstãpné zéńdzenié Zymkòwców òdbãdze sã w czerwińcu, tim razã w Kartëzach. Ju terô wszëtczich piszącëch a simpatików kaszëbsczi pismieniznë serdeczno na no zéńdzenié rôczimë.

belok

PS. Pòdzãkòwanié dlô direchtóra Mùzeùm Pismieniznë ë Kaszëbskò-Pòmòrsczi Mùzyczi w Wejrowie, Bògùsławòwi Bréze, za żëczlëwòsc ë pòmòc w òrganizacëji zéńdzeniów ë wëdôwanim zsziwków Zymkù. Wiôldżé Dzãka!

ZYMKÙ

chtërné òdbądze sã 9 gòdnika (sobòta), gòdz. 10.00

w Mùzeùm Pismieniznë ë Mùzyczi Kaszëbskò-Pòmòrsczi w Wejrowie, sztr. Zómkòwô 2a

W programie:

Jak wiedno mdze wiele nônowszi kaszëbsczi pòezje, szpòrtu a prozë.

• specjalny gòsc : Jaromira Labùdda, chtërnô òpòwié ò swòji twórczoscë.
• prezentacjô nônowszëch dokôzów Zymkòwców
• wëbiér dokôzów do zsziwkù Zymk 6
• diskùsjô ò dzysdniowi lëteraturze