Tómk Fópka, nôlëżnik karna ZYMK, òstôł wëróżniony przez Klub Sztudérów Pomerania, za swòją robòtã na kaszëbsczim gónie, Medalią Stolema.
Gratulëjema najemù drëchòwi ë żëczëmë dôlszi bòkadny robòtë w rozkòscerzaniô kaszëbsczégò dëcha.
Zymkòwcë
Aj, drãgò szło wëdanié 5. zsziwkù Zymk, drãgò. Cãżczi to béł pòród, ale w kùńcu sã ùdôł. Chòc nen numer mógł ju wińdz z drëkarnie w gòdnikù 2005 r., abò w stëcznikù 2006 r., jednakò dopiérzë w czerwińcu 2006 r. dokôzë 14 młodëch kaszëbsczich lëteratów ùzdrzałë wid swiata. Në cëż, lepi pòzdze jak wcale.
Nie bëło bë tegò Zymkù, czejbë nié czile lëdzy. Na pierszim placu nót je pòdzãkòwac Bògùsławòwi Bréze – direchtorowi Mùzeùm Pismieniznë ë Kaszëbskò-Pòmòrsczi Mùzyczi w Wejrowie. To òn pòstôrôł sã ò dotacjã z Ministerstwa Bënowëch Sprôw ë Administracjë, chtërné pòzëskôł Òglowi Zarząd Kaszëbskò-Pòmòrsczégò Zrzeszeniô. Kąsk je to pòkraconé, ale doch żëjemë w kraju zwónym Pòlską… Tu nick ni mòże bëc prosté! Dëtczi na nen zbòżny cél delë téż Jan, Tomôsz ë Adam Drzéżdżónowie ze Starzëna. Wiôldżé dzãka!
(wicy…)
W Mùzeùm Pismieniznë ë Mùzyczi Kaszëbskò-Pòmòrsczi w Wejrowie, 13 maja 2006 r., rozdówné òstałë nôdgrodë w XI kònkùrsu prozatorsczim miona Jana Drzéżdżóna.
Kòmisjô sãdzowskô w skłôdze: dr Zbigniew Żakiewicz, Barbara Pisarek, prof. Tadeusz Linkner, red. Stanisłôw Janke, w kategòrie jãzëka kaszëbsczégò przëznała nôdgrodë:
Na kònkùrs wpłinãło 14 prôc pò kaszëbskù, je to kąsk mni jak łoni.
Miło je, że dobëło jaż dwùch Zymkòwców br. Zbigórz Joskòwsczi ë Róman Drzéżdżón. Łoni bëło jich téż dwùch: Grégòr Schramke (I môl) ë Róman Drzéżdżón (II môl).
belok
Wnetka szesc gòdzyn waralë kaszëbsczé rozegracëje XIV kaszëbsczégò kònkùrsë Bë nie zabëc mòwë starków, chtërny òdbéł sã w Dãbògórzim. Wëstąpiło 43 gôdôszów ze spòdlecznëch szkòłów, gimnazjów ë strzédnëch szkòłów pùcczégò pòwiatë. Òceniwała jich sãdzowskô kòmisjô w skłôdze: Elżbieta Derc – direchtór pòwiatowi biblioteczi w Pùckù, Stanisłôw Janke – pisôrz ë gazétnik z Wejrowa ë Jerzi Łysk – pòéta z Pùcka. Jimprezã prowadzëlë Jadwiga Piernickô ë Pioter Kaszuba.
Kònkùrs zacząl sã ò dzewiąti gòdzënie. Zebrónëch pòwitalë gòspòdëni Kaszëbsczégò Dodomù w Dãbògórzim Éwa Pùrskô ë wójt Gminë Kòsôkòwò Jerzi Włudzik. Przemôwialë téż, żëcząc jak nômni tremë a jak nôwicë zabôwë, pùcczi starosta Artur Jabłońsczi ë direchtór pùcczégò mùzéùm Mirosłôw Kùklik.
(wicy…)
Zymkòwcë do piór (abò kòmpùtrowëch klawiatur). Czas ju wëdac nôstãpny numer Zymkù, dlôte proszã ò przesylanié swòjëch dokôzów na adres belok1_NO_SPAM_@o2.pl
Wëdanié planëje sã na kùńc tegò rokù. Na tekstë żdajã do pòłowë lëstopdanika.
Róman Drzéżdżón
Bôczënk admina: Z e-mail adresë Rómka proszã rëmnąc “_NO_SPAM_”)
Dzëczé gãsë. Antologia kaszëbsczi pòezji je zbiorã 159 wiérztów 28 autorów piszącëch pò kaszëbskù. Ùsôdzcowie Antologië… Róman Drzéżdżón ë Grégòr Jarosz Schramke, ùdbalë so zebrac dokôzë a napisac biogramë pòétów, chtërny òd lat 80. XIX stalata do kùńca lat 90. XX stalata, wëdalë apartny zbiérk.
14 maja 2005 rokù w Mùzeum Pismienniznë ë Mùzyczi Kaszëbskô-Pòmòrsczi we Wejrowie òstôł rozstrzëgniãti X Òglowòpòlsczi Kònkùrs Prozatorsczi miona Jana Drzéżdżóna.
W kategòrëji dokazów pisónëch pò kaszëbskù dwa pierszé place zajãlë Zymkòwcë – Grégòr J. Schramke (I plac; za dokôz “W pòdzemny sôdze”) ë Róman Drzéżdżón (II plac, za dokôz “Przëjãcé”).
Òbadwa ne dokazë òstóną òpùlikòwóné w numrze 4/2005 (zélnik) dwamiesãcznika “Pomerania”, pòzni nalezą sã téż w pòkònkùrsowi antologiji kaszëbsczi prozë, jaczi pòsobné dzéle są wëdôwóné co pôrã lat (slédnô – “Kaszëbsczé dzeje ë dzysészé żëcé” – ùkôza sã w 2004, a nalazłë sã w ni dokazë nôdgrodzoné na nym kònkùrsu w latach 2000-2003).
Z leżnoscë Jastrów wszëtczim czëtińcóm kaszëbsczi pismieniznë żëczã wielã, bëlnëch kaszëbsczich dokôzów do czëtaniô, a Zymkòwcóm, bë ne ùdbë co sã rodzą w glowie rãka letkò mògla na papiórze zapisac.
Róman Drzéżdżón
15 łżëkwiata w Dodomie Kaszëbsczim w Dãbògórzim òdbãdze sã XIV kònkùrs kaszëbsczi gôdczi “Bë nie zabëc mòwë starków” miona Jana Drzéżdżóna. Latos wëstąpi 45 gôdôszów z pùcczégò pòwiatë, w szterzech wiekòwëch karnach (spòdleczné szkòłë kl. I-III ë IV-VI, gimnazja ë pònôdgimnazjalné szkòłë). Kòżdi mùszi zaprezentowac szteczk z kaszëbsczi pismieniznë ë gwôsny dokôz na wëbróny przez se temat.
Ùkôzôl sã ju Zymk 4 – zsziwk mlodëch ùtwórców kaszëbsczi pismieniznë. W nym hefce mòże przëczëtac dokôzë Aszi Gackòwsczi, Alicjë Skiba, Anë Marijë Bartkòwsczi, Sławeka Fòrmelë, Macéja Doraua, Tomeka Fópka, Môrcëna Òdelsczégò, br. Zbigniéwa Joskòwsczégò, Grégòra J. Schramke, Sławeka Krause, Piotra Cëskòwsczégò ë Rómana Drzéżdżóna. Zymk 4 wëdala Wëdowizna Region (www.region.jerk.pl) razã z Mùzéùm Pismieniznë ë Mùzyczi Kaszëbskò-Pòmòrsczi w Wejrowie. Rôczimë do czëtaniô… a téż do kùpiéniô! (wicy…)